 |
| يعني ايه اكتتاب |
تعالوا النهارده نتكلم عن مصطلح جديد دايما بنسمعه مقترن بالبورصة و هو "الاكتتاب"
و على فكرة لو حد قالك إن "الاكتتاب" ليه علاقة ب "كتب الكتاب" يبقى أكيد << ضحك عليك
- طيب ما إحنا بنسمع لفظ اكتتاب ده كتير بس منعرفش يعني إيه؟!
الفكرة كلها إن لما بيكون فيه شركة حابة توفر رأس مال عشان تبتدي نشاطها أو حتى تكبر نشاطها اللي شغال بالفعل هي بتقوم بعملية إصدار أسهم عشان تطرح للجمهور و بكده يكون الجمهور تحصل على حصة من الشركة و في المقابل تحصلت الشركة على رأس المال اللي عايزها.
- اااااااه يعني نفهم من كلامك ده إن الاكتتاب هي عملية شراء الأسهم ؛ طيب ما هو ده اللي إحنا بنعمله في البورصة!!!
ﻷ مش بالظبط ، ﻷن هي بالفعل عملية شراء للأسهم بس مش زي اللي في البورصة ؛ ﻷن السهم اللي بيصدر في عملية الاكتتاب منقدرش نتداول عليه في البورصة إلا بعد ما يطرح للتداول ؛ و بتتم عمليات الاكتتاب من خلال الشركة نفسها أو من البنك أو شركات السمسرة ... و ده على عكس عمليات الشراء اللي بتتم في البورصة و اللي بتكون عن طريق شركات السمسرة فقط.
و طبعا نفهم من ده إن عملية الاكتتاب هي إصدار السهم للمرة الأولى و اللي منها بيتم تمويل الشركة ، في حين إن عملية الشراء اللي بتتم في البورصة
بتكون عبارة عن إنتقال لملكية السهم من شخص ﻷخر أيا كان شخص فردي أو شخص إعتباري.
نتمنى إننا نكون قدرنا نوصل الفكرة ببساطة ، و أنتوا كمان قولولنا إيه هي المصطلحات اللي دايما بتسمعوها و حابين تفهموا معناها
0 comments:
Post a Comment