النهارده هنتكلم عن مصطلحين دايما بنسمعهم مرتبطين بلفظ البورصة هنعرف معناهم و نوضح الفرق ما بينهم ببساطة ، المصطلحين دول هم ( السهم / السند )
إيه هو السهم؟؟
- السهم هو ورقة مالية بتمثل حصة ملكية في رأس مال الشركة ... يعني إيه الكلام ده؟؟
يعني هنفترض إن شركة ما أصدرت عدد من الأسهم قيمة كل سهم 100 جنيه ، معنى كده إني لو أشتريت 10 أسهم يبقى أنا كده شريك في الشركة ديه بحصة 1000 جنيه من رأس مال الشركة ، و عشان كده قيمة السهم بتقل بضعف أداء الشركة و بتزيد بزيادة نشاطها و أرباحها و ده لأني شريك جوه الشركة
طيب أومال السند إيه هو بقى ؟؟
- السند هو ورقة مالية بتمثل دين أو إلتزام على الشركة ... يعني إيه الكلام ده بقي ؟؟
هنفترض إن الشركة أصدرت عدد معين من السندات قيمة السند 100 جنيه ، معنى إني لو أشتريت 10 سندات أكون أنا كده مقرض الشركة ديه قرض قيمته 1000 جنيه ، و بناء على القرض ده الشركة بتديني فوايد كل فترة محددة و في نهاية مدة القرض الشركة بترجعلي تاني القيمة اللي كنت مقرضها ليها اللي هي 1000 جنيه ، و عشان كده قيمة السند مش بتتأثر بأداء الشركة لأن هي بتمثل قرض للشركة ملوش علاقة بأداء الشركة إن تحسن أو ساء.
طيب يعني ببساطة كده إيه الفرق بين السهم و السند؟؟
السهم بيمثل حصة من ملكية الشركة في حين إن السند بيمثل قرض للشركة و ليس له علاقة بأي ملكية
ده كان توضيحنا لمفهومين من أكتر المفاهيم المرتبطة بعالم البورصة و أسواق المال ، نتمنى إننا نكون قدرنا نوضحهم ببساطة و في الحلقات الجاية هنستكمل رحلتنا في تبسيط عالم أسواق المال لأن هدفنا هو خلق ثقافة عامة بمجالنا و إننا نوصل العلم لكل الناس
المصدر : chart voice
0 comments:
Post a Comment